Canle de comunicación dos mozos e mozas que compoñen o Bloque Nacionalista Galego de Ordes.

14/05/2011



Novo Boletín de Información á Mocidade!!





























07/11/2010

GALIZA NOVA DE ORDES IMPULSA UNHA RECOLLIDA DE SINATURAS PARA O MANTEMENTO DO NOITEBÚS

A organización xuvenil do BNG considera moi importante este servizo para o sector do lecer nocturno en Ordes.
Galiza Nova de Ordes, organización xuvenil do BNG, anunciou que iniciará nos próximos días unha recollida de sinaturas na comarca de Ordes para reclamar á Xunta de Galiza a continuidade do servizo de Noitebús. Esta iniciativa da organización xuvenil nacionalista constitue a continuación da campaña iniciada polo BNG coa presentación dunha moción no Concello de Ordes na que se instaba á Xunta a manter en funcionamento o transporte público nocturno a lugares de lecer sen aplicar ningunha redución das rutas e mellorando a súa dotación e funcionamento, esta moción conseguiu o apoio de todos os Grupos Políticos da Corporación Municipal, excepto o PP, no Pleno celebrado o pasado 26 de outubro.
Galiza Nova de Ordes informou de que a recollida de sinaturas se focalizará nos centros de ensino secundario da comarca ordense, e fixo fincapé en que “a demanda que rexistrou este servizo desde a súa posta en funcionamento da boa mostra de que é un servizo necesario do que non se pode prescindir”.
Para a organización xuvenil nacionalista “resulta difícil de entender que o goberno do PP na Xunta pretenda a supresión dun servizo que posibilitou perto de 400.000 desprazamentos no último ano, cun custo total de 4,5 millóns de euros, inferior ao que vai costar a todos os galegos e galegas a visita do Papa”.
Galiza Nova de Ordes lembrou que “desde a propia Dirección Xeral de Tráfico afirmouse que este servizo ten demostrado a súa eficacia, contribuindo a eliminar vítimas e a concienciar sobre a condución segura, e a plataforma Stop Accidentes ten cualificado a pretensión do goberno do PP de desastre, engadindo que sempre é máis barato previr que lamentar”.
Finalmente, a organización xuxenil nacionalista salientou que “este servizo resulta sumamente importante no concello de Ordes, onde o sector do ocio nocturno ten grande importancia económica, como o demostra a existencia de liñas de Noitebús que comunican Ordes, durante as noites da fin de semana, con concellos tan importantes como Carballo, Santiago ou A Coruña”.

24/09/2010

29 de setembro: manifestación en apoio á folga xeral


Galiza Nova participará das manifestacións convocadas pola CIG para o vindeiro 29 de setembro, en apoio á folga xeral.

Desde a nosa organización chamamos ás mozas e mozos a participar destas mobilizacións coas que amosaremos o rexeitamento á contrarreforma laboral aprobada polo PSOE no goberno do Estado e demandaremos un cambio de rumbo nas políticas en materia laboral, así como outro modelo económico e social máis xusto e solidario.

Polo futuro da mocidade, polo futuro de Galiza. Non faltes!
Compostela, 12.30 h, Praza Roxa.

14/08/2010

GALIZA NOVA DE ORDES DENUNCIA A EXISTENCIA DE VERTEDOIROS INCONTROLADOS EN PLENO CENTRO URBÁN DO CONCELLO.


Para a organización xuvenil do BNG é inconcibible que un concello como o de Ordes, distinguido con varios premios en xestión de residuos, permita a existencia de vertedoiros en varios puntos da vila, incluíndo o centro urbán.


Dende Galiza Nova de Ordes, creemos que é lamentable que o alcalde Manuel Regos e o edil de medio ambiente Xesús Pedreira, presuman de ir recoller a bandeira verde no hotel Ritz de Madrid o pasado mes de Maio e en cambio, que existan este tipo de vertedoiros incontrolados no casco urbano do pobo de Ordes e nas parroquias do concello.

A organización das mocidades do BNG quere denunciar e esixir a inmediata eliminación dun vertedoiro incontrolado situado na Rúa do Mediodía, que está a causar innumerables molestias aos veciños e a contaminación do medio ambiente.

Lamentablemente o vertedoiro da Rúa Mediodía non é un caso illado, xa que no Concello abundan este tipo de vertedoiros nos que se acumula todo tipo de residuos, dende escombro, bolsas de plástico, ferros, ata electrodomésticos; que contaminan o medio ambiente e prexudican a saúde de todos os veciños e veciñas.

18/04/2010

No Concello de Ordes, líderes en desemprego xuvenil.

Índice de paro xuvenil segundo datos de xaneiro de 2010.
Ordes atópase á cabeza dos Concellos da Comarca en paro xuvenil, sendo 114 os menores de 25 anos que integraban as listas do paro a finais do pasado ano.

Como consecuencia da crise económica que estamos a vivir, ó longo dos últimos meses o número de parados en Galiza foi en aumento, e como é lóxico Ordes non permaneceu alleo a esa tendencia.
No noso concello foron varias empresas as que levaron a cabo ou ben reducións de plantel, ou directamente pecharon a porta e deixaron ós seus empregados na rúa.
Resulta moi preocupante a evolución do desemprego no Concello de Ordes, xa que, en comparación con Oroso, Cerceda, Trazo e Tordoia, superamos a súa taxa de paro nun 33% e desgraciadamente, non imos quedar nestas cifras, xa que todas as previsións apuntan a que estas se incrementen nos próximos meses. Ante este panorama, dende Galiza Nova de Ordes, cremos que cómpre actuar e tratar de por solucións que, cando menos, freen esta tendencia.
Dende Galiza Nova cremos que debe levarse a cabo a elaboración dun Plan de Emprego Xuvenil (PEX), no que se faga unha análise da realidade socioeconómica do Concello e se recollan actuacións encamiñadas a facilitar a integración no mercado laboral da xente nova. Estas actuacións deben incidir na formación, a orientación e a inserción no mercado de traballo.
De seguido expóñense unha serie de ideas que ben poderían ter cabida no PEX:
1. Promoción da contratación da xente nova por parte das empresas establecidas no Concello mediante incentivos a aquelas que empreguen xente moza a través de contratos de longa duración.
2. Creación dun viveiro de empresas para favorecer o autoemprego.
3. Nos concursos públicos, que o Concello teña en conta especialmente a aquelas empresas que contraten xente moza de Ordes. Así como que, aqueles postos de traballo dependentes directamente do Concello (Radio Ordes, mestres de obradoiros, monitores de actividades) sexan ocupados por xente moza do Concello.
4. Creación de Obradoiros de Emprego encamiñados a lograr a ocupación dos mozos e mozas á vez que se forman. Nestes momentos, podería ser de gran interese a creación dun Obradoiro de Enerxías Renovables e Eficiencia Enerxética.
5. Realización de actividades formativas que proporcionen competencias ós moz@s en eidos tales como a soldadura, fontanería, electricidade, albanería, axuda a domicilio, agricultura ecolóxica, hostalería, etc. mediante o emprego das axudas existentes das distintas administracións.
6. Realización de prácticas profesionais nas empresas locais por parte dos estudantes universitarios.